Под мотото „Помагајќи им на другите си помагаме себеси“ , денеска беше организирана уште една од низата хуманитарни акции на „Крепост “во соработка со општинската организација на Црвениот крст од Куманово. Акцијата за собирање на финансиски донации, прехранбени продукти , средства за лична хигиена и облека за дечиња до 12 годишна возраст траеше три часа.
-Во соработка со хуманитарната организација„ Крепост“ организираме собирна акција за помош за деца од рурални средини. Одзивот е голем, акцијата трае до 13 часот, а најмногу досега се собра облека за деца , храна и финансиски средства, изјави Давид Живковиќ , ОО Црвен крст, Куманово
Граѓаните уште еднаш покажаа дека се хумани и сакаат да прават добри дела.
– Во соработка на Црвениот крст и ХО „Крепост “ собираме добротворни финансиски средства за руралните средини, како што се Кучкарево, Градиште и Орашац. Има масовен одзив на граѓаните, мали дечиња доаѓаат и подаруваат своја облека и патичиња на своите врсници од руралните средини . Куманово го буди своето хумано срце, очекуваме да организираме уште многу акции , изјави Христијан Георгиевски, ХО „Крепост“
-Со овие парични средства ќе бидат купени прехранбени производи како и пакети кои ќе им бидат однесени на семејствата на кои што им е најпотребно во руралните средини, изјави Марко Андевски, ХО „Крепост“
„Крепост “ и Црвениот крст од Куманово планираат да организираат уште заеднички хуманитарни акции.
